LEQDICAT  n useggas 2012

ASALI N TFEWWAṚT                     

Acebbeḥ d uqeɛɛed n umṛaḥ amecṭuḥ, ur yelli wara si tazwara deg wahil, maca yessefk ad ilin ikersiwen d wayen ara yessedhun arrac imi aṭas n wakud i sɛeddayen dinna. Iɣimi deg yikersiwen n umṛaḥ yewwi-d tikti n tfewwaṛt akken ad tcebbeḥ tamuɣli, xas ma yella lebni n tfewwart-agi d ugur di tazwara. Di tikli n wakud, iban-d wayen yugaren tikti i sεan warrac, imi d nitni i yessulin asenfaṛ n tfewwaṛt di tuget ( llsas, tiɣeṛɣeṛt, leswaṛ...atg ) Acebbeḥ n umṛaḥ-agi i lmend n warrac, yuɣal d amkan d-ijebden imezdaɣ n taddart i yufan talwit deg-s, ula d imsebriden ttεeddayen ɣuṛ-s kra n teswiεin.

Taɣamsa tadigant d tin yerzan s axxam n tmusni dɣa gar-asen yiwen uneɣmas n « Tamurt.info » i yefkan i usenfaṛ « Axxam n tmusni » azal n umagrad ɣezzifen, deg-s asegzi i lεamma.

TIMES DI TADDART 

Ussan n Dda Ḥmed di tmurt deg wagur n Ɣect ur d-glin ara s ufud i « Uxxam n Tmusni » imi tendeh tmes azal n 3 ssmanat di tẓegwa akked tzemrin, ula d kra yixxamen tewweḍ-iten.

Axessaṛ d win meqqṛen, limer mačči d tadukli n wat taddart, tili yegla « Uxxam n Tmusni », ɣef waya yemdel tiwwura-s; d aseḥṛes ɣef tudert n warrac. Rnu ɣeṛ-s, Dda Ḥmed yelha-d d usuddes gar yimezdaɣ akken ur ttilin ara ccwalat mgal iɣallen n lεeskeṛ i yekkaten ad d-sekren lɣiḍ n Yiqbayliyen.

Tamawt: imezdaɣ gezment-tt di ṛṛay ɣef ssebba n tmes, d iserdasen n lεeskeṛ akked yiǧadaṛmiyen.

ASENΣET N USARU

Mačči d ayen ṛǧan warrac (ula d kra n yilmeẓyen) ur nekcim ɣer tzeqqa n ssinima deg tudert-nsen, asenεet n usaru i tikkelt tamezwarut di taddart yezwar-it yiswi zeddigen.Asaru-yagi d anecṛaḥ (US) i lmend n warrac i ifeṛḥen ayendin imi d ayen i sen-yewwḍen s teqbaylit. Asenεet-nniḍen ad d-yili akken ad faṛṣen wid ur nelli ara.

ASEḤBIBER ƔEF TWENNAṬ

Leɣyab n yiɣallen usizdeg akked ujmaε n yiḍumman, ǧǧan imdanen ad d-xelqen allalen i waya ula deg ugama; ayagi mačči d ayen iweεṛen i usefhem n warrac imi ttwalin liḥala n twennaṭ tettuɣal ar deffir di Tmurt n Yiqbayliyen; ur ḥwaǧen ara teɣzi n wawal imi sεeddan azgen n wass deg usizdeg d ucebbeḥ n Kraḍ KM deg yiwen ubrid yettawin ar taddart

TUẒUT N YISEKLA AKKED UẒEṬṬA N UMRAR

Di tmurt, tili n yisekla d tin yesεan azal ɣef teɣzi useggas; ɣef waya i neẓẓa isekla n ttut d ameqyas ɣef « Axxam n Tmusni ». Akken ad bedden yisekla, yessefk ad ttwiqqnen s kra n wallal ur nettḍuṛṛu wara tawennaṭ.Aya yeǧǧa-yaɣ ad d-nagem si lejdud-nneɣ.Annect-a yeslul-d tamsirt n tussniwin n ugama i d-yellan deg umṛaḥ.S yimɣi n « Adles » nexdem-d imurar swayes ncud isekla n ttut akken ad gmun d asawen; rnu ɣeṛ-s nexdem-d amrar azuran ameqqṛan maḍi i usḥab n ttεebga ẓẓayen.

URAREN AKKED CCFAYA

Wagi d urar yesnernayen ccfaya n warrac.Amesnulfu-nes d yiwen Uqbayli yettidiren di Lalman.Urar-agi yesseḥfaḍ daɣen tutlayt Taqbaylit s usedhu. Ad tafem urar-agi ɣer « Axxam n tmusni ».