LEQDICAT  n useggas 2013

ALLALEN N TISLI I WID YESΣAN UGUREN

Deg wussan yesεedda dda Ḥmed di tmurt, yuɣal Uxxam n tmusni d tazeqqa i udawi n wid yesεan uguren n tisli s leḥḍur n kra imussnawen Iqbayliyen-Almanen deg uḥric-agi.Ɣef teɣzi n yiwen wass, llan Sin yimejjayen n tisli akked yiwen umεiwen si Lalman i lmend n warrac yesεan uguren n tisli.Imussnawen-agi d wid yefkan baṭel afus n tallelt ama s wakud neɣ s tussna-nsen neɣ allalen atraren i tisli. Imussnawen-agi d wid iqedcen s wayen akk zemren akken ad rren tisli n warrac ɣer waddad ilaqen; d ayen i ten-yesfeṛḥen u d ayen i d-yesseɣlin imeṭṭawen n yibabaten-nsen.4 warrac n temnaḍin yemgaraden si tmurt n Yiqbayliyen; gar 4 akked 14 iseggasen i ikecmen amaḍal-nniḍen imi sen-d-tuɣal tisli. Yiwen uqcic yessuter bab-as akken ad yehdeṛ di tilifun ticki i iḥulfa s tudert-is tbeddel imi ur yumin ara ad tbeddel fell-as deg yiwet n tikkelt. Ayagi yerra-d taḍṣa ɣef udmawen n kra n warrac imi d ccɣel igerrzen maḍi u d ayen iεeddan akken iwata. Mass Ḥmed yesnemmer s yisem n warrac akked twaculin-nsen tawacult Σammuṛ yefkan tazmert tameqqṛant i ccɣel-agi.

AMERREḤ ƔER YILEL

Imuṛas n unebdu zgan ḥman, taftist iqeṛben akk ɣef Uxxam n tmusni d tin n Tigzirt.Arrac ur ssawḍen ara ad rzun ɣer teftisint aṭas n tikkal ladɣa llan wid ur nwala ilel deg leεmeṛ-nsen.Ɣef waya, tikti n tirza ɣer yilel d tin iwulmen.Tirza-yagi yettmagar-itt ugur n turagt n yimawlan, allal usiweḍ akked yiselsa n lεum. Kra n teqcicin ur tent-ǧǧin ara yimawlan-nsen. Massa Anna tettwassen di taddart imi d tamdakelt n warrac n Uxxam n tmusni, d yiwet yettaken afus n tallelt; d nettat i d-yewwin iselsa n lεum i teqcicin. I usiweḍ, yettwakra-d yiwen uṭṛuli amectuḥ ass-kamel. Imi yetwaheyya kullec, dda Ḥmed akked 13 yifṛax n 7 ar 13 yiseggasen ṭṭfen abrid ɣer teftist, aṭṛuli yufes s wayen akk ḥemlen warrac ama d ddwabex n waman, iselsa, allalen n turart.. ...atg nebla ma nebttu učči ur nxuṣ di kra seg uɣṛum ar lfakya. D ass ur tettun ara warrac xas ma d ass yesseεyan aṭas dda Ḥmed imi ihaj yilel, d ayen i t-yeǧǧan ad yeldi allen-is ɣef yal agrud. Di taggara, tignatin d tid i d-yeǧǧan zzhu, nnecṛaḥa akked tukksa n lxiq ɣef yal yiwen.

TAGIDA (ṬṬABLA) N TINIS

Si Lalman ɣer tmurt, yextaṛ dda Ḥmed ad yunag s tkeṛṛust, si gar lqecc i d-yewwi i Uxxam n tmusni, tella ṭṭabla n tinis i yettwaqublen s lfeṛḥ.

SSQEF

Ssqef n ssima, d win yettaṭṭafen lḥamu akked tasmuḍi yerna yecmet; tikkelt-a yettwabeddel s uɣanim.

INEBGI SI LALMAN

Massa Christa Anna seg uwanek afidiṛal “ Saarland ”, tesεa assaɣen n tegmat akked Uxxam n tmusni, terza i tikkelt tamezwarut ɣer Tmurt n Yiqbayliyen.Aya yeǧǧa-tt ad tẓer si lqeṛb tamurt d wamek ileḥḥu usenfaṛ s leqdic-is. Uqbel kulci, tebɣa ad tissin arrac akken ad tefk afus n tallelt deg wayen yerzan asedwel.Tinubga n massa Christa Anna d tin yekksen akk leqyud akked umgarad n tutlayt, dɣa d tamenzut ɣef warrac tirza n tmeṭṭut tabeṛṛanit ɣer taddart yerna s yifassen yeččuṛen ama d isegniyen n lexyaḍa, tikurin n taduṭ, tibwaḍin i wunuɣ d waṭas n yisafaren i leqdic ufus; ayagi yakk mačči kan d tikci i warrac, maca d leqdic ara yezdin massa akked warrac xas ur myussanen ara, xas mačči yiwet n tutlayt i ten-yezdin.

Imi d-yewweḍ lawan n tuɣalin, ssarmen warrac akken ma llan ad d-tuɣal massa Anna i iwehmen amek εeddan wussan-is (dduṛt) s tɣawla di Tmurt n Yiqbayliyen, ulamma tḥawec-d aṭas n waktayen i tt-yeǧǧan ad teṛgem i umeqqṛan d umecṭuḥ tuɣalin.

ASELMAD YUƔALEN D ANELMAD

D zzheṛ yezmummgen i Uxxam n tmusni, yiwen yilemẓi i d-iṛuḥen kan akka nebla asiher nebla tadrimt akken ad yesselḥu kra n temsirin di Teqbaylit xerṣum 2 tikkal di dduṛt.Isem-is Lmulud, d bab n taɣult imi yeɣṛa tutlayt.Lmulud ur yeṭṭif ara axeddim acku yeznuzuy lxedṛa akked lfakya (akken llan tuget n yilmeẓyen Iqbayliyen ass-a).

Timsirin ttilint ass n Lǧemεa akked Ttlata.I yinelmaden ? amecṭuḥ akk deg-sen yettheyyi anekcum-is s aɣerbaz, ma d awessar akk ad yili ɣef tewwura n testaɣt (lantrit). Wa d ameqqṛan ur neɣṛi ara, wihen d amecṭuḥ lḥaṣul wa zdat wa akken ad lemden taɣuṛi s tutlayt-nsen tayemmat ama d aǧeṛnan neɣ d adlis.

TIMSIRIN N TALLELT AKKED TEMSIRIN I YIWESSAREN

 Lwiza d tilemẓit si taddart iqeṛben tin n Uxxam n tmusni, d taqeddact nebla εeyyu deg tallelt di tutlayt n Tefṛansist i lmend n warrac, rnu tettεawan-iten deg yikayaden. Si tama-nniḍen, yal ass ɣef 11 uzal, rezzun warrac ɣef leqdicat ufus i xeddmen deg Uxxam n tmusni imi iqubel aɣerbaz amenzu, d ayen yessasehlen tuqqna n tɣuṛi-nsen ɣer wayen ttafen deg Uxxam n tmusni.

ASBEDDI N UFRAG S YIMƔAN

Asemmiḍ, akked ugeffur zgan-d d ugur i usbeddi n ufrag s yimɣan rrif n Uxxam n tmusni Xas akken, tṣaḥ-asen-d temsirt i warrac deg wayen yerzan tussniwin n ugama i d-yewwin ɣef tarrayt n tuẓut n yisekla dɣa imɣan i ufrag.

TIMLILIT GAR TLAWIN

AWAL ƔEF Amkan-agi yessegraw daɣen tilawin n taddart i yemlalen akken ad mbadalent tikta akked umeslay deg yisental yemgaraden. Timlilit-nsent cebbḥen-tt s lqahwa akked tẓidanin.